தெரிந்த பெயர், தெரியாத விவரம்: மேட்டூர் அணை..

* கர்நாடகம் தொடங்கி தமிழகம் வழியாக ஓடி முடிவில் கடலில் கலக்கிறது காவிரி ஆறு.

* தமிழகத்தில் தர்மபுரியில் ஒகேனக்கல் நீர்வீழ்ச்சியாக மக்களை மகிழ்விக்கிறது.

* சேலத்தில் மேட்டூர் வழியாக சீத்தாமலை, பால மலை ஆகிய இரண்டு மலைகளுக்கிடையே பயணிக்கிறது. மேலும், மேட்டூருக்கு அருகில் சித்தேஸ்வரன் மலை, தங்கமலை ஆகியவையும் உள்ளன.


* நீரைத் தேக்கி விவசாயத்திற்கும், மின்சாரத் தேவைகளுக்கும் பயன் படுத்த வேண்டும் என்னும் நோக்கத்தில் ஓர் அணை கட்ட முடிவெடுக்கப்பட்டது. தஞ்சை மாவட்ட விவசாயிகளின் கோரிக்கையே இதற்கு முக்கிய காரணம். முடிவெடுத்தவர் சர் ஆர்தர் காட்டன் என்ற பொறியாளர்.

* தஞ்சை மாவட்ட விவசாயிகளின் நீண்டநாள் கோரிக்கையை ஏற்று, 1801-ஆம் ஆண்டு ஆங்கிலேய அரசு மேட்டூரில் அணைகட்டுவதற்கு முயன்றது; அப்போது மைசூர் சமஸ்தானம் ஆட்சேபணைஎழுப்பியதால் அத்திட்டம் கைவிடப்பட்டது.

* 1923-ஆம் ஆண்டில் தஞ்சை மாவட்ட விவசாயிகள் ஒன்று சேர்ந்து, சர் சி.பி.ராமசாமி அய்யர், திவான்பகதூர் விஸ்வேஸ்வரய்யா போன்றோர் மூலம் மைசூர் சமஸ்தானத்திடம் அனுமதி பெற முயற்சித்தனர். ஆனால், மைசூர் சமஸ்தானத்தார் மீண்டும் ஆட்சேபணை தெரிவித்தனர்.

* உடனே, தஞ்சை விவசாயிகளுக்கு புயல் மற்றும் வெள்ள சேதத்தினால் ஏற்படும் இழப்புகளுக்கு ஆண்டு தோறும் ரூ.30 லட்சம் நஷ்டஈடாக மைசூர் சமஸ்தானத்தார் கொடுக்கவேண்டும் என தஞ்சை மாவட்ட ஆட்சித் தலைவர் மூலம் மைசூர் சமஸ்தானத்திற்கு நோட்டீஸ் கொடுத்தனர்.

* ஆண்டுதோறும் ரூ.30 லட்சம் கொடுப்பதைக் காட்டிலும் , மேட்டூரில் அணைகட்டுவதற்கு சம்மதம் கொடுப்பதே சிறந்தது என திருவாங்கூர் சமஸ்தானத்தினர் எடுத்துக்கூறி மைசூர் சமஸ்தானத்தை சம்மதிக்கவைத்து, அணை கட்ட அனுமதிக் கடிதம் பெற்று தஞ்சை மாவட்ட ஆட்சித்தலைவருக்கு அனுப்பிவைத்தனர். அதன்படி 1923-இல் அணைகட்டத் தொடங்கினர்.

* தொடங்கப்பட்ட ஆண்டு 1923 ; முடிக்கப்பட்ட ஆண்டு 1934. ஒன்பது ஆண்டுகளில் 10,000 பணியாளர்கள் கட்டுமானப் பணியில் ஈடுபடுத்தப்பட்டனர்.

* சர் ஆர்தர் காட்டன் முடிவெடுத்த ஆண்டு 1834. பணி முடிவடைந்த ஆண்டு 1934. ஒரு திட்டம் நிறைவேற ஒரு நூற்றாண்டு ஆகிவிட்டது.

* கட்டி முடிக்கப்பட்டபோது, ஆசியாவிலேயே பெரிய அணையாக இருந்தது. தற்போது, தமிழகத்திலேயே பெரியது என்னும் பெருமையுடன் விளங்குகிறது.

* 1934-ஆம் ஆண்டு கவர்னர் ஸ்டேன்லி என்பவரால் திறந்து வைக்கப்பட்டது. இதனால், இவர் பெயரால் மேட்டூர் அணை அழைக்கப்பெறுகிறது.

* அணையின் அகலம் 5,300 அடி. உயரம் 170 அடி. ஆயினும் 120 அடி உயரம் வரையே நீரை சேமிக்க முடியும். மொத்த பரப்பளவு 20.2 லட்சம் ஹெக்டேர்.

* மேட்டூர் அணையினால், சேலம், ஈரோடு, நாமக்கல், கரூர், திருச்சி, தஞ்சாவூர் ஆகிய மாவட்டங்களில் 2,71,000 ஏக்கர் நிலங்கள் பயன்பெறுகின்றன. ஆனால், அணை கட்டப்பட்ட பகுதியில் பல கிராமங்கள் - கோயில்கள் இடிக்கவேண்டியதாகிவிட்டது என்பதையும் மறக்க முடியாது.

* அணையின் முன்புறம் ஒரு பெரிய நீர்ச்சுரங்கம் அமைக்கப்பெற்று, நீர் மின் திட்டச் சுரங்கம் மூலம் மின்சாரம் தயாரிக்கப்படுகிறது.

* நீர் ஆதாரம் தருகிறது, மின்சாரம் தயாரிக்கப்படுகிறது என்பதுடன், இவ்விடம் ஒரு சுற்றுலா மையமாகவும் விளங்குகிறது.

* அணை முன்பு ஒரு பூங்காவும் அமைக்கப்பட்டுள்ளது.

* அணையை வடிவமைத்தவர் ராயல் பொறியாளர் கர்னல் டபிள்யூ.எம்.எல்லீஸ். மேட்டூர் அணையின் சிற்பி என்றழைக்கப்படும் இவரின் மார்பளவு உருவச்சிலை இங்கு அமைக்கப்பட்டுள்ளது.

* அணையில் நீர் வற்றிப்போகும் காலங்களில் ஜலகண்டீஸ்வரர் கோயிலையும், பெரிய நந்தி சிற்பம் வெளியே தெரிவதையும் காணமுடியும்.

* மிக உயர்ந்து நின்று தமிழகத்துக்குப் பெருமை சேர்க்கிறது.
-நவீன் குமார்