'ஸ்மார்ட்' ரேஷன் கார்டை பொதுமக்களுக்கு வழங்கும் திட்டத்தை சென்னை அருகே கொரட்டூரில் தமிழக முதலமைச்சர் எடப்பாடி கே. பழனிசாமி நாளை (ஏப்ரல் 1) தொடங்கி வைக்கிறார்.

✳ தமிழகத்தில் பொருள்கள் வாங்காத அட்டைகள், காவலர் அட்டைகள், சர்க்கரைக்கு மட்டும் வழங்கப்பட்ட அட்டைகள், எல்லாப் பொருள்களும் வாங்கும் அட்டைகள், அந்தியோஜனா அன்னபூர்ணா திட்டம் என 5 வகைகளில் 1.91 கோடி குடும்ப அட்டைகள் பயன்பாட்டில் உள்ளன.

✳ இந்த அட்டைகளுக்கு 34,774 நியாய விலைக்கடைகள் மூலம் உணவுப் பொருள்கள் விநியோகம் செய்யப்பட்டு வருகின்றன.

✳ இதற்குப் பதிலாக புதிய அட்டைகள் வழங்காமல் பல ஆண்டுகளாக உள்தாள் இணைக்கப்பட்டு பயன்பாட்டில் இருந்து வருகின்றன.

✳ இதில் போலி குடும்ப அட்டைகளைப் பயன்படுத்தியும் பொருள்களை வாங்கி வந்தனர்.

✳ அரசு மானியத்தில் வழங்கும் உணவுப் பொருள்கள் உண்மையான பயனாளிகளுக்கு சென்றடையும் வகையிலும், முறைகேடுகளைத் தடுக்கும் நோக்கத்திலும் பழைய குடும்ப அட்டைகளுக்குப் பதிலாக புதிதாக நவீன கையடக்க அளவில் ஸ்மார்ட் கார்டுகள் வழங்கும் திட்டம் கொண்டு வரப்பட்டது.

✳ இதன் அடிப்படையில் இந்த அட்டைகள் அச்சடிக்கும் பணிகள் மும்முரமாக நடைபெற்று வருகின்றன.

கொரட்டூரில் தொடக்கம்:

✳ இத்திட்டத்தை அம்பத்தூர் அருகே கொரட்டூரில் சனிக்கிழமை நடைபெறும் அரசு விழாவில் தமிழக முதலமைச்சர் எடப்பாடி பழனிசாமி தொடங்கி வைக்கிறார்.

✳ இதில் உணவுத் துறை அமைச்சர் காமராஜ் ஆகியோர் பங்கேற்க இருக்கின்றனர்.

மற்ற மாவட்டங்களில்..

✳ மாநில அளவில் சென்னை தவிர்த்து 285 வட்டங்களில் குடும்ப அட்டைதாரர்களின் எண்ணிக்கைக்கு ஏற்ப சமுதாயக் கூடம், திருமண மண்டபங்களில் முகாம் அமைத்து ஸ்மார்ட் ரேஷன் அட்டைகள் வழங்கப்பட உள்ளன.

✳ முதலமைச்சர் தொடங்கி வைத்ததும் அந்தந்தப் பகுதியைச் சேர்ந்த அமைச்சர்கள், சட்டப்பேரவை உறுப்பினர்கள் மற்றும் அதிகாரிகள் முன்னிலையில் பொதுமக்களுக்கு 'ஸ்மார்ட்' ரேஷன் அட்டைகள் வழங்கப்பட இருக்கின்றன.

கூட்டத்தைத் தவிர்க்க..

✳ 'ஸ்மார்ட்' ரேஷன் அட்டை பெறும்போது நெருக்கடி ஏற்படுவதைத் தவிர்க்கும் வகையில் முதல் நாளே அந்தந்தப் பகுதி கூட்டுறவு நியாய விலைக்கடைப் பணியாளர்கள் மூலம் தகவல் தெரிவிக்க ஏற்பாடு செய்யப்பட்டுள்ளது.

✳ அதேபோல், குடும்ப அட்டைகளின் எண்கள் வரிசை அடிப்படையில் தகவல் பலகையில் வெளியிடவும் ஏற்பாடு செய்யப்பட்டுள்ளது.

'ஸ்மார்ட்' ரேஷன் அட்டையை பெற

✳ பழைய குடும்ப அட்டையுடன் குடும்பத் தலைவரோ அல்லது குடும்ப அட்டையில் பெயர் உள்ளவர்கள் ஆதார் அட்டையை காண்பித்து ஸ்மார்ட் ரேஷன் அட்டையை பெற்றுக் கொள்ளலாம்.

✳ இந்த அட்டையை வாங்கியவுடன் உடனே அருகில் உள்ள கூட்டுறவு நியாய விலைக்கடைக்குச் சென்று நவீன கருவியில் ஸ்மார்ட் அட்டையை பதிவேற்றம் செய்து செயல்பாட்டுக்குக் கொண்டு வரவேண்டும்.


🔵 ஸ்மார்ட் கார்டு விநியோகம் தொடர்பாக குடும்ப அட்டைதாரர்களின் செல்லிடப்பேசிக்கு தகவல் அனுப்பி வைக்கப்படும் என்று மதுரை மாவட்ட ஆட்சியர் கொ.வீரராகவ ராவ் தெரிவித்துள்ளார்.

🔸 இதுகுறித்து அவர் வெளியிட்டுள்ள செய்தி:

💳 குடும்ப அட்டைதாரர்களுக்கு புதிய ஸ்மார்ட் கார்டுகள் சனிக்கிழமை முதல் வழங்கப்பட உள்ளன.

🔹  அதுகுறித்த விவரம் குடும்ப அட்டைதாரர்களின் செல்லிடப்பேசிக்கு குறுந்தகவலாக அனுப்பி வைக்கப்படும்.

🔸 குறுஞ்செய்தியில் உள்ள கடவுச் சொல், பழைய குடும்ப அட்டை, ஆதார் அட்டை, குறுஞ்செய்தி பெறப்பட்ட செல்லிடப்பேசி ஆகியவற்றுடன் சம்பந்தப்பட்ட நியாய விலைக் கடைக்குச் சென்று ஸ்மார்ட் கார்டு பெற்றுக் கொள்ளலாம்.

🔹 இதற்கு எவ்விதக் கட்டணமும் செலுத்த வேண்டியதில்லை.

🔸 இதுவரை செல்லிடப்பேசி எண் பதிவு செய்யாதவர்கள் உடனடியாக தங்களது நியாய விலைக் கடையில் பதிவு செய்து கொள்ள வேண்டும்.

🔹 ஸ்மார்ட் கார்டு குறித்து குறுஞ்செய்தி வராதவர்கள் அச்சம் அடையத் தேவையில்லை.

🔸 அனைத்து குடும்ப அட்டைதாரர்களுக்கும் ஸ்மார்ட் கார்டு வழங்கப்படும் என்றார்.