உயிரிழந்த தொழிலாளர்களின் பி.எஃப். கணக்குகளுக்கு 7 நாளில் தீர்வு !!

உயிரிழந்த தொழிலாளர்களின் வருங்கால வைப்பு நிதி (பி.எஃப்.) கணக்குகளில் இருந்து, சம்பந்தப்பட்ட உறவினர்களுக்கு 7 நாள்களில் வைப்புத் தொகையைத் திருப்பி அளிப்பதற்கான வழிகாட்டு நெறிமுறைகளை மண்டல
அலுவலகங்களுக்கு தொழிலாளர் வருங்கால வைப்பு நிதி அமைப்பு (இ.பி.எஃப்.ஓ) செவ்வாய்க்கிழமை அனுப்பியது.


 இதேபோல், பணி ஓய்வு பெறும் தொழிலாளர்களுக்கு அவர்கள் பணி ஓய்வு பெறுவதற்கு முன்பாகவே வைப்புத் தொகையை அளிப்பதற்கான வழிகாட்டு நெறிமுறைகளையும் இ.பி.எஃப்.ஓ. அனுப்பியுள்ளது. இதுதொடர்பாக, மத்திய தொழிலாளர் நலத் துறை அமைச்சகம் செவ்வாய்க்கிழமை வெளியிட்ட அறிக்கையில் கூறப்பட்டுள்ளதாவது:
 தொழிலாளர் வருங்கால வைப்பு நிதி தொடர்பாக, தில்லியில் கடந்த மாதம் 26-ஆம் தேதி நடைபெற்ற ஆய்வுக் கூட்டத்தில் பிரதமர் நரேந்திர மோடி சில உத்தரவுகளைப் பிறப்பித்திருந்தார்.



அந்த உத்தரவுகளின் படி மேற்கொள்ளப்பட்டுள்ள பணிகளை மத்திய தொழிலாளர் நலத் துறை அமைச்சர் பண்டாரு தத்தாத்ரேயா, செவ்வாய்க்கிழமை ஆய்வு செய்தார்.
 பணி ஓய்வு பெறும் தொழிலாளர்களுக்கும், பணியின்போது உயிரிழக்கும் தொழிலாளர்களின் குடும்பத்தினருக்கும் வைப்புத் தொகையை விரைந்து வழங்குவதற்கான வழிகாட்டு நெறிமுறைகள், மண்டல அலுவலகங்களுக்கு அனுப்பி வைக்கப்பட்டுள்ளதாக அமைச்சரிடம் மத்திய வருங்கால வைப்பு நிதி அமைப்பின் ஆணையர் கூறினார். அதன்படி, பணி ஓய்வு பெறும் தொழிலாளர்களுக்கு, அவர்கள் பணி ஓய்வுபெறும் நாளிலோ அல்லது அதற்கு முன்னதாகவோ வைப்புத் தொகையை வழங்கவும், உயிரிழக்கும் தொழிலாளர்களின் குடும்பத்தினருக்கு 7 நாள்களில் வைப்புத் தொகையை வழங்கவும் உரிய நடவடிக்கை எடுக்க வேண்டும் என்று அந்த வழிகாட்டு நெறிமுறைகளில் குறிப்பிடப்பட்டுள்ளது என்று அந்த அறிக்கையில் தெரிவிக்கப்பட்டுள்ளது.